好多傳統行業嘅老闆，平時最驚就係「轉型」兩個字。覺得又要寫 Code 又要買 Server，其實數碼轉型真係無咁複雜。我哋每日用得最多嗰個 WhatsApp，其實已經係最好嘅開單工具，以下為WhatsApp 免費推廣秘籍。
一個老闆的痛點故事： 喺深水埗開特賣場嘅陳生，每日忙到踢晒腳。佢話：「我唔係唔想做推廣呀，但我一個人對住個 WhatsApp 幾百個 Message，覆得 A 嚟 B 又走咗，仲要記住邊個係熟客、邊個要送貨，真係覆到手都軟，邊有時間諗點樣搵新客？」
陳生呢個情況，其實係好多香港老闆嘅縮影：唔係無生意，而係無效率。 今日我就教大家幾招，用 WhatsApp Business 呢個免費工具，將你間鋪變成自動化生意機器！（注 : 要用WhatsApp Business 才能使用以下技巧）
WhatsApp Business 開設「公司戶口」同建立「客戶清單」—— 唔好再用你個私人號碼！
點解有效？
用私人號碼同客傾生意，好易搞亂私人生活，客亦覺得你唔專業。用 WhatsApp Business App（免費下載），可以設定公司資料、自動回覆，客一眼就知搵緊邊間，即時建立信任。
具體步驟：
- 去你手機嘅「Play Store」（Android）或「App Store」（iPhone），搜尋 「WhatsApp Business」 並免費下載。
- 用一張新電話卡（最平嗰種就得）登記。強烈建議唔好用老闆私人電話！
- 設定你嘅「商業檔案」：放入公司Logo、準確嘅地址（可以連結去Google地圖）、營業時間、網站（如果有）。
- 開始建立清單：將熟客嘅電話號碼，逐個加入手機通訊錄，可以加個標籤如「VIP客」、「街坊群組」。WhatsApp Business會自動識別到佢哋有用WhatsApp。
注意事項/常見錯誤：
- 大忌：亂咁加人入Group！ 未經同意就拉人入谷，好易被投訴甚至封鎖。最好面對面問客人：「陳生，我哋開個VIP谷，有優惠第一時間通知，方唔方便加你入去？」取得同意先。
- 商業App同個人App可以並存，一部手機搞掂，放心。
WhatsApp 免費推廣技巧一：善用「標籤 (Labels)」功能，將客源分類
點解有效： 好多老闆嘅 WhatsApp 好似個大雜燴，熟客、新客、追數、入貨通通塞埋一齊。用標籤可以幫你快速搵到「未俾錢」或者「VIP客」，做推廣嗰陣唔使盲摸摸。
具體操作步驟：
- 長按你想標籤嘅對話。
- 點擊上方嘅「標籤」圖示（似個標籤牌）。
- 新增標籤，例如「VIP熟客」、「待出貨」、「查詢中」。
- 以後要做推廣，可以直接喺標籤入面揀人發放訊息。
注意事項： 唔好設太多標籤，3-5 個最理想，否則你自己都會亂。
WhatsApp 免費推廣技巧二：設定「自動回覆 (Quick Replies)」，唔使次次打字
點解有效： 客通常問嘅嘢都係嗰幾樣：「幾點開門？」、「有無現貨？」、「邊度交收？」。次次人手打字真係好嘥時間。
具體操作步驟：
- 去「設定」->「商業工具」->「快速回覆」。
- 設定快捷鍵，例如輸入
/address，系統就自動出晒你鋪頭個完整地址同地圖。 - 下次客問地址，你打個
/字就搞掂！
注意事項： 雖然係自動回覆，但開頭記得加句「你好呀」或者客嘅名，感覺親切啲，唔好太似機械人。
WhatsApp 免費推廣技巧三：利用「目錄 (Catalog)」功能，將 WhatsApp 變網店
點解有效： 唔使再逐張相 send 俾客睇。將你嘅皇牌產品放入目錄，客可以好似行街咁自己睇，甚至直接放入購物車。
具體操作步驟：
- 「商業工具」->「目錄」->「新增項目」。
- 上傳產品相片，寫清楚價錢同埋描述。
- 客入到你個 Profile 就可以直接睇到你賣緊咩。
注意事項： 相片一定要清，如果影得太鬆郁朦，客會覺得間鋪唔專業。
技巧四：建立「廣播列表 (Broadcast Lists)」而非 WhatsApp Group
點解有效： 好多老闆鍾意拉客入 Group，但其實香港人好反感無啦啦被入 Group，仲會見到其他客嘅電話。用「廣播列表」，訊息會一對一咁 send 俾客，保護私隱之餘，客亦覺得係你親自搵佢。
具體操作步驟：
- 喺對話界面點擊「廣播列表」->「新列表」。
- 揀選你想發送嘅客（前提係佢哋手機有 save 你個電話）。
- 打好一段吸引嘅文字（例如：今日熱賣蛋撻出爐啦！），一掣就發出。
注意事項： 千祈唔好「炸機」！一星期最多發 1-2 次，否則好容易被客封鎖（Block）。
結語：數碼轉型，由試一招開始！
老闆們，數碼轉型唔係要你一日變做科技大亨。今日返去試下將你啲客分好「標籤」，或者設一個「自動回覆」，你就會發現每日可以慳返半個鐘。
香港中文 
简体中文